Ráða her lögmanna til að leiðrétta milljarða mistök

Lífeyrissjóðurinn Stapi hyggst ráða hóp innlendra og erlendra lögmanna til að vinna að því að leiðrétta mistök sem gerð voru hjá Lögmannsstofunni á Akureyri, en hún gleymdi að lýsa fjögurra milljarða króna kröfu sjóðsins í bú Straums-Burðaráss. Sjóðurinn hefur um mánuð til að greiða úr málinu og verður einskis látið ófreistað til að ná fram leiðréttingu.

Lögmannsstofan sem ber ábyrgð á mistökunum verður væntanlega látin greiða kostnað vegna þeirrar vinnu. Ennfremur er ljóst að einhver eftirmál hljótist af mistökunum hver svo sem endanleg niðurstaða verður.

Fari mál á versta veg verður tjónið umtalsvert fyrir sjóðinn og getur rýrt ávöxtun hans um tvö til 4%. Stapi er í hópi sex stærstu lífeyrissjóða landsins.