Gleymdu að lýsa fjögurra milljarða króna kröfu í Straum

Lögmannsstofa sem átti að lýsa fjögurra milljarða króna kröfu í Straum fyrir lífeyrissjóðinn Stapa gleymdi að lýsa kröfunni fyrir þann frest sem gefinn var. Nú þarf að leita samþykkis annarra kröfuhafa til að unnt verði að endurheimta einhvern hluta þessarar kröfu, annars tapast fjárhæðin að öllu leyti.

Í hádegisfréttum RÚV um málið kom fram að frestur til að lýsa kröfum í Straum rann út þann 18. júlí síðastliðinn en Straumur hefur fengið heimild til nauðasamninga. Lífeyrissjóðurinn Stapi á Akureyri á um fjögurra milljarða króna kröfu í bú Straums Heildarstærð lífeyrissjóðsins er um 100 milljarðar króna og sjóðsfélagar eru um 45-50 þúsund.

Fyrir mistök gleymdi Lögmannstofan ehf. á Akureyri að lýsa þessari fjögurra milljarða króna kröfu lífeyrissjóðsins Stapa í Straumsbúið og er því óvíst hvort krafan verði tekin til greina.