Garðabær stendur langbest að vígi

fjárhagur Tap á hvern íbúa í Reykjavík nam um 598.091 krónu á árinu 2008. Skuldir á hvern íbúa eru 1,3 milljónir á íbúa ef tekinn er mismunur á skuldum og eigin fé.

Garðabær er í betri stöðu. Neikvæð staða bæjarins nam 38,9 milljónum á árinu 2008, sem samsvarar aukningu um 3.756 krónur á hvern íbúa. Hins vegar er hlutfall af eigin fé og skuldum jákvætt upp á tæpar 773 milljónir. Það þýðir að hver íbúi „á inni“ 74.582 krónur.

Reykjanesbær er í svipaðri stöðu og Reykjavík. Neikvæð skuldastaða er rúmlega átta milljarðar á árinu 2008, sem nemur um 572.234 krónur á hvern íbúa. Skuldir á hvern íbúa nema um einni milljón.

Kópavogur stendur betur að vígi. Tap bæjarins var um 9,6 milljarðar á árinu 2008 sem þýðir 320.937 krónur á hvern íbúa. Bærinn skuldar hins vegar um 23,5 milljarða sem þýðir 783.961 króna á íbúa.

Á Akureyri var tap um 288.752 krónur á íbúa á árinu 2008. Akureyri skuldar um 18 milljarða, sem gerir rúmlega eina milljón á íbúa.

Í Árborg er staðan mjög svipuð og á Akureyri og í Reykjanesbæ. Þar eru skuldir á hvern íbúa 913.300 krónur.

Ekki var hægt að reikna út skuldastöðu á hvern íbúa í Hafnarfirði. Ástæðan er sú að ekki er enn ljóst hvernig ársreikningurinn verður þar sem hann hefur hvorki verið samþykktur af skoðunarmönnum né ræddur af bæjarstjórn.

Við íbúatölur í útreikningum er miðað við tölur Hagstofu Íslands frá 1. janúar 2009. Í öllum skuldatölum er gert ráð fyrir mismuninum á eigin fé og skuldum.

vidirp@frettabladid.is