Hefur ekki greitt húsaleigu frá áramótum

Háskólinn á Bifröst hefur ekki greitt húsaleigu frá því fyrir áramót og eigandi fasteignanna gæti farið fram á háskólinn rými húsnæðið. Lagaleg flækja, segir rektor skólans, sem bendir á að eigandinn hafi ekki uppfyllt atriði kaupsamnings sem snúa að viðhaldi og yfirtöku lána. Rektorinn er sagður hafa verið bæði ósamvinnuþýður og erfiður í samningum.

Mostra, dótturfélag Nýsis, keypti í ágúst árið 2007 fasteignir Háskólans á Bifröst. Um fjórðungur kaupverðs var greitt í reiðufé en restin var m.a. fjármögnuð af Sparisjóðnum í Mýrarsýslu og Íbúðalánasjóði. Mostra og Háskólinn gerðu leigusamning til ársins 2037 og var verðmæti samningsins um 6 milljarðar. Háskólinn á Bifröst hefur frá því fyrir áramót ekki greitt húsaleigu og er skuld skólans við Mostru nú á bilinu 100 til 200 milljónir. Ágúst Einarsson, rektor við háskólann á Bifröst, segir að skólinn haldi að sér höndum þar sem Mostra hafi ekki uppfyllt atriði kaupsamningsins sem m.a. snúa að viðhaldi og yfirtöku lána.

Í skýrslu sem ráðgjafafyrirtæki vann fyrir kröfuhafa kemur fram að rektor háskólans hafi verið erfiður og ósamvinnuþýður en unnið hefur verið að því síðasta hálfa árið að finna lausn á málinu.

Háskólinn á Bifröst hefur nú gert tilboð í hlutafé Mostru upp á 30 milljónir.

Í húsaleigulögum kemur fram að greiði leigjandi ekki húsaleiguna sé leigusala heimilt að rifta leigusamningi. Því gæti dótturfélag Nýsis farið fram á að leigusamningi verði rift. Haraldur L. Haraldsson, framkvæmdastjóri Nýsis, vildi ekki tjá sig um málið þegar leitað var eftir því.