Peningaþvættið enn á borði saksóknara

Ríkissaksóknari hefur ákært Gunnar Viðar Árnason fyrir innflutning á um sex kílóum af amfetamíni til landsins í hraðsendingu í vor. Rannsókn málsins leiddi til þess að tveir menn til viðbótar, Sigurður Hilmar Ólason og Ársæll Snorrason, voru einnig handteknir og úrskurðaðir í gæsluvarðhald. Þeir eru hins vegar ekki ákærðir fyrir smyglið.

Málið var margþætt og grunaði lögreglu að þeir Ársæll og Sigurður hefðu átt hlut í tiltölulega umfangsmiklu peningaþvætti erlendra fíkniefnasmyglara. Sá angi málsins liggur enn á borði Ríkissaksóknara og ekki er útilokað að hann leiði til ákæru.

Gunnari Viðari var birt ákæran fyrir fíkniefnasmyglið á mánudag og verður hún þingfest á föstudag. Gunnar Viðar hefur setið í varðhaldi vegna málsins frá því 22. maí. Gunnar hefur áður komið við sögu lögreglu vegna fíkniefnamála, og hlaut tveggja og hálfs árs fangelsisdóm árið 2005 fyrir innflutning á fjórum kílóum af amfetamíni.

Rannsókn lögreglu á tengslum þeirra Sigurðar og Ársæls við erlendu fíkniefnasalana hefur verið mjög umfangsmikil. Sigurður hefur játað að hafa stofnað fyrirtæki fyrir tvo menn, Ísraelsmanninn Erez Zizov og hinn hollenska Ronny Verwoerd, en neitar því alfarið að það hafi verið gert með það að augnamiði að þvætta fíkniefnagróða mannanna.

Fyrir liggur að Ársæll kom mönnunum í samband við Sigurð, en Ársæll þekkir þá síðan hann sat inni í Hollandi.

Lögreglan hleraði síma Sigurðar í lengri tíma, og kom meðal annars fyrir hlerunarbúnaði inni á skrifstofu hans. Samkvæmt heimildum Fréttablaðsins eru til upptökur af Sigurði og mönnunum tveimur að ræða peningaþvætti.

Þá óskaði lögregla eftir upplýsingum um listaverkaeign Sigurðar vegna rannsóknarinnar, en Sigurður, sem hefur verið nokkuð umsvifamikill athafnamaður á Íslandi undanfarin ár, á myndarlegt listaverkasafn.

Sigurður og Ársæll hafa báðir hlotið dóma fyrir fíkniefnasmygl.

Ársæll hlaut fimm ára fangelsisdóm í svokölluðu BMW-máli og hafði áður hlotið fjögurra ára dóm í Hollandi. Hann afplánar nú eftirstöðvar fyrri dóms. Sigurður hlaut þriggja ára fangelsisdóm árið 2001 fyrir aðild að smygli á 30 kílóum af hassi til landsins.

stigur@frettabladid.is