Fólkið talið hafa kveikt í með bensíni

Þrír karlmenn og ein kona voru handtekin í morgun grunuð um að hafa kveikt í einbýlishúsi við Kleppsveg með bensíni. Karlmaður á miðjum aldri forðaði sér út úr brennandi húsinu sem nánast eyðilagðist í eldinum.

Slökkviliðið á höfuðborgarsvæðinu var kallað að horni Langholtsvegar og Kleppsvegar upp úr klukkan hálf níu í morgun vegna elds í bíslagi einbýlishúss. Fjórum mínútum síðar var slökkviliðið komið á vettvang og hafði eldurinn þá náð að læsa sig inn í mitt húsið. Eldurinn logaði þá glatt í bíslaginu.

Einn karlmaður á miðjum aldri var í húsinu en hann hafði komist út af eigin rammleik áður en lögregla og slökkvilið kom á staðinn.

Ágætlega gekk að slökkva eldinn en þó var töluverð vinna að slökkva glæður í þaki og útveggjum. Húsið er bárujárnsklætt og úr timbri en forskalað að hluta og að sögn slökkviliðs er það nánast ónýtt.

Samkvæmt upplýsingum frá lögreglu voru þrír karlar og ein kona - öll á þrítugsaldri - handtekin á staðnum í morgun, grunuð um aðild að íkveikjunni. Þau voru á vettvangi þegar lögregla kom á staðinn, á vappi kringum bíl og í stympingum fyrir utan húsið. Vitni sá til þeirra með bensínbrúsa. Ekki er vitað hvort fólkið þekkti íbúann.