Tók hvorki myntkörfu-, bílalán né yfirdrátt

„Hjá mér hefur lífið lítið breyst í kreppunni til allrar Guðslukku," svarar Helga Möller söngkona aðspurð hvernig hún tekst á við íslenskar aðstæður í dag.

„Ég er ennþá flugfreyja hjá Icelandair og söngkona þess á milli ásamt því að vera fararstjóri í golfferðum fyrir Peter Salmon en að sjálfsögðu finnur maður fyrir hækkandi húsnæðislánum og hækkandi matarverði og öðrum hækkunum."

„Ég var allavega mjög heppin að vera búin að venja mig af allskonar óráðsíu. Ég er ekki með bílalán, myntkörfulán eða yfirdrátt. Það eru nokkur ár síðan ég ákvað að snúa þessu við og hefur aldrei liðið betur."

„Núna á ég bara fyrir því sem ég er að gera eða bíð þar til ég hef efni á því og svo er annað að maður hefur nú stundum gott af þvi að staldra við og spyrja sig hvort maður virkilega þurfi á þessu og hinu að halda. Svarið er venjulegast nei," segir Helga.

Átak í matarinnkaupum

„Ég hef tekið mig mikið á varðandi matarinnkaup og nýtingu á mat og í dag finnst mér það bara virkilega skemmtilegt verkefni. Það þarf alls ekki að henda alltaf því gamla heldur á maður að láta sér þykja vænt um það og vera stoltur af því."

„Ég segi það ekki, að ég, að sjálfsögðu, átti það til að kaupa eitthvað sem mig vantaði alls ekki og þarf oft að taka mig taki þessa dagana að fara ekki að eyða i eitthvað bara til þess að eyða."

„En mikið rosalega verður maður stoltur ef manni tekst að standast freistingarnar. Eitt af því sem ég geri til að spara er að stunda göngutúra og heimaleikfimi en það kostar ekki neitt og eins og segir í kvæðinu heimaleikfimi er heilsubót, hressir mann upp og gerir mann stífan, hvort sem að undir er gras eða gjót, gólfteppi, elhúsborð, stóll eða dívan," segir Helga hress í bragði.

„Ég hendi mér út í klukkutíma göngutúr, geri síðan magaæfingar, armbeygjur og æfingar með lóðum og enda á góðum teygjum. Ekki er verra að fara í heitt bað á eftir og gott axlanudd frá karlinum klikkar aldrei," segir Helga.

Syngjandi stolt amma

„Ég er mest að syngja á Þorrablótum og árshátíðum á þessum árstíma en þó alls ekki allar helgar," svarar Helga aðspurð um sönginn.

„Ég vil geta átt tíma fyrir sjálfa mig og fjölskylduna og skemmtilegasta hlutverkið þessa dagana er að vera amma. Ömmustrákurinn minn Jóhann Georg, 3 ára, er sá eini sem getur stjórnað ömmu sinni algjörlega."

„Hann er farinn að fara með mér í golf og fékk golfsett frá mér og manninum mínum í jólagjöf og ég get ekki beðið eftir því að fara með hann í golf i sumar. Hann fékk putter og eina kylfu í fyrrasumar og ég fór með hann sirka einu sinni í viku að æfa okkur og hann féll gjörsamlega kyllifaltur fyrir þessari íþrótt og spyr í hvert skipti sem hann sér mig hvort við séum ekki að fara í golf. Einnig situr hann límdur við sjónvarpstækið með mér þegar er verið að sýna frá golfmótum," segir Helga með bros á vör.