Jóhanna tekur til varna í grein á vef FT

Jóhanna Sigurðardóttir forsætisráðherra gagnrýnir beitingu hryðjuverkalaganna og þrýsting Hollendinga vegna láns Alþjóðagjaldeyrissjóðsins í varnargrein sem birtist á vef Financial Times rétt fyrir klukkan sjö í kvöld.

Fyrirsögn greinarinnar er „Íslendingar eru reiðir, en munu færa fórnir," en þar útskýrir Jóhanna þá stöðu sem Íslendingar eru í.

Hún kemur inn á beitingu Bresku ríkisstjórnarinnar á hryðjuverkalögum, þar sem Landsbankinn var settur í hóp með alræmdum hryðjuverkasamtökum. Hún bendir á að engin fullnægandi skýring hafi verið gefin á þessum aðgerðum.

Þá segir Jóhanna einnig frá fréttum þess efnis að Hollendingar hafi lagst gegn lánveitingum AGS til landsins til að tryggja stöðu sína í Icesave málinu.

Þessar aðgerðir hafi gefið þá mynd að embættismenn innan fjármálaráðuneyta landanna tveggja hafi notað stöðu sína gegn veikari aðila þegar samið var um Icesave.

Því sé erfitt að sannfæra Alþingi og þjóðina um að samkomulag um Icesave reikningana sé óhjákvæmilegt. Til skoðunar sé að setja fyrirvara við samninginn til að tryggja afkomu og fullveldi landsins.

Í greininni aftekur Jóhanna þó að Íslendingar kenni Bretum og Hollendingum um allt sem aflaga fer, líkt og í veðri hefur verið látið vaka í erlendum fjölmiðlum.

Hins vegar segir hún þjóðina, sem ekki finnist hún ábyrg fyrir alheimsfjármálakreppunni, reiða yfir að þurfa að taka á sig risavaxnar skuldbindingar einkabanka. Hún segir Íslendinga hins vegar reiðubúna að færa fórnir til að tryggja samband og viðskipti við umheiminn.

Í niðurlagi greinarinnar segist Jóhanna vona að þjóðir stórra landa á borð við Bretland og Holland átti sig á þeim varanlegu áhrifum sem yfirvöld þeirra geti haft á smáríki á borð við Ísland á erfiðum tímum.