Bretar hvattir til að gera jólainnkaupin snemma

Bretar eru hvattir til þess að hefja jólainnkaupin snemma til að forðast það að jólagjafirnar glatist vegna yfirvofandi verkfalls póststarfsmanna.

Starfsmenn Royal Mail póstflutningafyrirtækisins í Bretlandi hafa samþykkt að fara í verkfall með nærri sjötíu prósent atkvæða.

Leiðtogar stéttarfélags þeirra munu svo hittast á mánudaginn til þess að ákveða næstu skref í stöðunni. Þeir þurfa að tilkynna um verkfall með sjö daga fyrirvara til þess að forðast algjöra ringulreið í póstþjónustu í landinu.

Sérfræðingar á sviði póstflutninga hafa miklar áhyggjur af áhrifum verkfallsins á jólaviðskiptin og hvetja fyrirtæki sem treysta mikið á póstþjónustu, svo sem Amazon og ebay til að gera ráðstafanir þannig að viðskipti þeirra fari ekki úr skorðum. Einkum ef verkfallið mun vara þangað til líður að jólum.

Þá eru bankar og greiðslukortafyrirtæki hvött til þess að sýna tillitssemi ef greiðslur dragast sökum þess að reikningar hafa ekki borist skuldurum í tæka tíð vegna verkfallsins.