VG ver minnihlutastjórnina í Grindavík

Bæjarfulltrúar Vinstri grænna, Samfylkingar og Framsóknarflokksins í Grindavík hafa undirritað samkomulag sem felur í sér að fulltrúar VG verja minnihlutastjórn Samfylkingar og Framsóknar með hlutleysi sínu út kjörtímabilið. Þar með er þeirri óvissu sem skapaðist þegar að annar af tveimur bæjarfulltrúum Samfylkingarinnar gekk í VG lokið.

Tveir bæjarfulltrúar Samfylkingarinnar og tveir bæjarfulltrúar Framsóknarflokksins mynduðu meirihluta í bæjarfélaginu síðasta sumar þegar slitnaði upp úr meirihlutasamstarfi Sjálfstæðisflokks og Samfylkingar. Í framhaldinu tók Jóna Kristín Þorvaldsdóttir við sem bæjarstjóri.

Hrókeringar í bæjarstjórn - Frjálslyndir án fulltrúa

Nýverið sagði bæjarfulltrúinn Garðar Páll Vignisson sig úr Samfylkingunni og gekk yfir í Vinstri græna, en flokkurinn fékk ekki neinn fulltrúa kjörinn í bæjarstjórn í kosningunum vorið 2006. Þar með var „meirihlutinn" ekki lengur með meirihluta í bæjarstjórn. Á sama tíma gekk Björn Haraldsson, eini bæjarfulltrúi Frjálslynda flokksins, til liðs við VG. Í dag sendi bæjarmálaráð flokksins Birni bréf og hvatti hann til að láta af störfum sem bæjarfulltrúi.

Vinstri grænir styðja málefnasamninginn

Í yfirlýsingu sem bæjarfulltrúar Samfylkingar, Framsóknarflokks og Vinstri grænna skrifuðu undir og birtist á heimasíðu bæjarfélagsins í dag segir:

„Bæjarfulltrúar B og S lista vilja áfram starfa að þeim velferða- og hagsmunamálum fyrir bæjarfélagið sem lagt hefur verið kapp á að vinna að frá því í júlí 2008. Bæjarfulltrúar Vinstri Grænna verja það stjórnarsamstarf og sammála þeim málefnasamningi sem B og S listi vinna eftir."



Bæjarstjórinn ekki lengur bæjarfulltrúi

Jóna Kristín hefur átið af störfum sem eini bæjarfulltrúi Samfylkingarinnar en sæti hennar tekur Hörður Guðbrandsson, fyrrum bæjarfulltrúi, en á síðasta kjörtímabili gegndi hann embætti forseta bæjarstjórnar. Hann mun gegna því á embætti á nýjan leik út kjörtímabilið en því lýkur í maí á síðasta ári.

Þá mun Petrína Baldursdóttir, bæjarfulltrúi Framsóknarflokksins, taka við sem formaður bæjarráðs.