Starfslokabæjarstjórinn græðir 10 milljónir á húsasölu til bæjarins

Grindavíkurbær hefur keypt einbýlishús Ólafs Arnar Ólafssonar, fyrrum bæjarstjóra, fyrir fimmtíu milljónir króna. Kaupin eru hluti af starfslokasamningi Ólafs sem lét af störfum í sumar en verður á launum til seinnihluta ársins 2010.

Í ráðningarsamningnum er ákvæði sem skuldbatt Grindavíkurbæ til að kaupa einbýlishús Ólafs tækist honum ekki að selja það sex mánuðum eftir starfslok. Húsið var keypt á rúmar 40 milljónir króna árið 2007. Mismunurinn er því rúmar 10 milljónír.

Ólafur sagði í samtali við fréttastofu að vísitala hafi hækkað frá því að húsið var sett á sölu í sumar. ,,Verðið var miðað við ákveðna vísitölu í ráðningarsamningnum. Þannig að það er ekki hægt að segja húsið hafi hækkað í verði."

Á launum í 28 mánuði frá starfslokum

Ráðningarsamningur Ólafs komst í hámæli í sumar þegar upp úr slitnaði í meirihlutasamstarfi Sjálfstæðisflokks og Framsóknarflokks. Í framhaldinu mynduðu framsóknarmenn nýjan meirihluta með Samfylkingunni og lét Ólafur á þeim tímamótum af störfum sem bæjarstjóri.

Ráðningartími Ólafs var út yfirstandandi kjörtímabil og af því loknu fær hann að auki sex mánaða laun. Næstu sveitarstjórnarkosningar fara fram í maí 2010. Í heildina mun Ólafur því fá greidd laun í 28 mánuði frá starfslokum.

Ólafur segir samninginn í samræmi við lög

Spurður í kvöld hvort að ráðningarsamingurinn hafi verið eðlilegur sagðist Ólafur ekki hafa ætlað að tjá sig um samninginn. Samt sem áður benti hann á lög um tímabundnar ráðningar og fullyrti að samningurinn væri í fullu samræmi við þau lög. ,,Þessi samningur er bara í samræmi við lögin þannig að hann er hvorki verri né betri heldur en aðrir sambærirlegir samningar."

Aðspurður hvort hann sé stoltur af ráðningarsamningnum sagði Ólafur: ,,Hvort ég er stoltur af honum. Þetta er bara samningur á milli tveggja aðila sem verið er að uppfylla að báðum aðilum. Ég réð mig í ákveðin tíma og var tilbúinn að standa við það."

Kostnaður bæjarfélagsins við launahlutann 42 milljónir

Mánaðarlaun Ólafs voru rúmlega 1,2 milljónir króna og þau voru jafnframt verðtryggð. Heildarkostnaður Grindavíkurbæjar með launatengdum gjöldum við launahluta samkomulagsins er yfir 42 milljónir króna.

Þegar núverandi meirihluti tók við 14. júlí voru laun bæjarstjóra lækkuð um 20%. Auk þess hefur sitjandi bæjarstjóri ekki samskonar ákvæði og Ólafur hafði um húsnæði sitt í ráðningarsamningi sínum.