Séra Örn styður biskup gegn séra Gunnari

Presturinn Örn Bárður Jónsson þakkar Davíð Þór Jónssyni guðfræðinema, fyrir pistil í Fréttablaðinu í dag og lýsir yfir stuðningi við afstöðu biskups Íslands í umdeildu máli séra Gunnars Björnssonar sem hefur verið færður til í starfi..

Séra Örn Bárður er fyrsti presturinn til þess að koma opinberlega fram og lýsa yfir stuðningi við ákvörðun biskupsins sem áður hafði verið mótmælt harðlega, meðal annars af prestum.

Í færslu sem Örn ritar um málið á heimasíðu sína segir: „Ég þykist vita að meiri hluti presta styðji biskup í málinu og kem hér með á framfæri afstöðu minni en ég tel að framferði séra Gunnars sé brot á siðareglum presta og geri það að verkum að hann geti ekki starfað sem prestur í söfnuði."

Tilurð þess að hann ritar þetta á heimasíðu sína er ekki síst vegna pistils sem Davíð Þór Jónsson skrifaði í Fréttablaðið í dag. Séra Örn sendi honum þessa línu í kjölfarið:

„Heill og sæll og þakka þér mergjaðan og aldeilis frábæran pistil í Fréttablaðinu í dag. Orð í tíma töluð. Af gefnu tilefni skal það tekið fram að sóknarprestur þinn gekk á fund biskups fyrir nokkru og lýsti yfir stuðningi við afstöðu hans í málinu. Jafnframt neitaði sá hinn sami beiðni prests nokkurs um að skrifa undir yfirlýsingu þeirra sem vildu styðja sr. Gunnar sem á endanum voru þó ekki nema 10."

Séra Örn Bárður vakti gríðarlega athygli þegar hann skrifaði sjálfur nokkuð magnaða smásögu sem birtist í Lesbók Morgunblaðsins árið 1999. Hún hét Íslensk fjallasala H/F. Hún var myndskreytt og minnti aðalsögupersónan mikið á Davíð Oddsson, þáverandi forsætisráðherra.

Pistil Davíðs má hinsvegar lesa hér.