Kröfuhafar beita málshöfðun sem tæki í samningaviðræðum

Kröfuhafar bankanna beita málshöfðun sem tæki í viðræðum um endurskipulagningu bankanna, segir prófessor í hagfræði. Haldi þeir málunum til streitu, eftir að þeir eru orðnir hluthafar að bönkunum, gætu þeir skaðað sína eigin hagsmuni.

39 bankar hafa nú sent inn formlega kvörtun til eftirlitsstofnunar EFTA vegna setningu neyðarlaganna. Bankarnir eru flestir í samningaviðræðum við skilanefndir íslensku bankanna um endurskipulagningu þeirra. Gylfi Magnússon, viðskiptaráðherra, telur kvörtunina til ESA ekki hafa áhrif á þær viðræður.

Gylfi segir þó að sú staða geti vel komið upp að erlendir kröfuhafar sem eignist banka hér á landi séu á sama tíma í málaferlum gegn íslenska ríkinu.

Friðrik Már Baldursson, prófessor við Háskólann í Reykjavík, segir þá stöðu einkennilega. Hann telur að með málshöfðunum hafi kröfuhafar viljað skapa sér betri samningsstöðu. Líkurnar á því að þeir vinni mál gegn ríkinu séu litlar.