Juventus ekki búið að gefa Dossena upp á bátinn

Ítalska félagið Juventus hefur verið sterklega orðað við hinn 27 ára gamla Andrea Dossena hjá Liverpool, en leikmaðurinn hefur ekki náð að stimpla sig almennilega inn á Anfield eftir að hafa komið frá Udinese á 7 milljónir punda síðasta sumar.

Juventus er á markaðnum eftir vinstri bakverði og eins og staðan er núna eru tveir leikmenn taldir vera efstir á óskalistanum, Dossena og Fabio Grosso hjá Lyon.

„Ég held að Juventus muni ákveða sig í næstu viku og valið stendur þá væntanlega á milli Dossena og Grosso. Aldurinn og launakröfur Dossena munu klárlega vinna með honum í þeirri baráttu," segir Roberto La Florio umboðsmaður Dossena í samtali við Calciomercato.