Við viljum svör: Opinn borgarafundur um Icesave í Iðnó

Steingrímur J. Sigfússon, fjármálaráðherra og aðstoðarmaður hans, Indriði Þorláksson, taka þátt í pallborðsumræðum á opnum borgarafundi um Icesave skuldbindingarnar sem haldinn verður í Iðnó klukkan átta í kvöld. Vonast er til að Gylfi Magnússon, viðskiptaráðherra, sjái sér fært að mæta.

Helgi Áss Grétarsson lögfræðingur og bróðir Guðfríðar Lilju Grétarsdóttur, þingmanns Vinstri Grænna, verður frummælandi af hálfu InDefence hópsins.

Á fundinum mun InDefence hópurinn kalla eftir gögnum frá ríkisstjórninni sem taki af allan vafa um að Íslendingar geti staðið við Icesave samkomulagið, sem nú liggur fyrir, og jafnframt endurreist efnahagslíf sitt.

Til umræðu verða helstu atriðin í þeirri gagnrýni sem komið hafa fram á samning ríkisstjórnarinnar um Icesave, en þau lúta meðal annars að lagalegu réttmæti þess að íslenskir skattgreiðendur taki að sér að greiða vanskil Landsbankans vegna Icesave og takmörkunum á regluverki ESB.

Bent hefur verið á að með samningnum gangist íslenska ríkið í takmarkalausa ábyrgð án nokkurra fyrirvara. Einnig hafa komið fram rökstuddar efasemdir um að íslenska ríkið geti staðið við þær fjárhagslegu skuldbindingar sem í samningnum felast, enda þurfi gjaldeyrisafgangur landsins ár hvert að vera meiri en nokkru sinni undanfarin 25 ár til þess að standa skil á greiðslum.

„Alþingi þarf að staðfesta ríkisábyrð á skuldum vegna Icesave til þess að samningurinn öðlist gildi. InDefence hópurinn hefur að undaförnu mælt fyrir því að sest verði að samningaborðinu að nýju og að þá verði tekið ríkara tillit til hinna erfiðu og fordæmalausu aðstæðna sem Ísland er í," segir í tilkynningu InDefence hópsins.

InDefence hópurinn hvetur fólk til að mæta og bendir á að allir Íslendingar verði að gera sér grein fyrir alvarleika málsins. „Samningurinn er slæmur og við viljum einfaldlega að það verði endursamið. Það voru stjórnarhættir félaga og stjórnarhættir hins opinbera sem brugðust. Við viljum ekki sjá sjö ára skjól og segja svo að málin reddist. Nú ætlum við að fá svör fyrirfram en ekki gera þetta eins og gert var, að spurningunum sé svarað eftir á," segir Magnús Árni Skúlason meðlimur InDefence hópsins.