Vefur um vistvæn innkaup opnaður

Vefurinn Vinn.is hefur nú verið opnaður, en hann er hluti af verkefninu Vistvæn innkaup. Að verkefninu standa umhverfisráðuneytið, Ríkiskaup, Reykjavíkurborg og Hafnarfjarðarbær.

Á vefnum eru upplýsingar sem gagnast kaupendum og útboðsaðilum, um það hvernig best er að kaupa inn og bjóða út á vistvænan hátt. Þar er einnig að finna ráðleggingar til seljenda.

Vefurinn styður við auknar áherslur opinberra aðila á það að taka tillit til umhverfissjónarmiða jafnt sem kostnaðar og gæða við innkaup. Skrifað var undir stefnu um vistvæn innkaup ríkisins í mars á þessu ári. Íslenska ríkið kaupir vörur, þjónustu og verk fyrir meira en 100 milljarða króna á ári sem er um fjórðungur af útgjöldum ríkisins. Með því að hafa umhverfissjónarmið til hliðsjónar við þessi innkaup, getur ríkið komið miklu til leiðar í umhverfismálum, að því er kemur fram í tilkynningu.

Samkvæmt vef umhverfisráðuneytisins fela vistvæn innkaup í sér margs konar ávinning fyrir kaupendur, birgja og samfélagið allt. Til dæmis draga vistvæn innkaup úr umhverfisáhrifum, þau geta minnkað kostnað og aukið gæði og síðast en ekki síst auka vistvæn innkaup framboð á vistvænum vörum og þjónustu sem nýtist samfélaginu í heild og hvetja til nýsköpunar.