Vistheimilanefnd skilar næstu skýrslu í september

Vistheimilanefnd sem kannar starfsemi vist- og meðferðarheimila fyrir börn hyggst skila áfangaskýrslu í september en nefndin hefur þegar rætt við á annað hundrað manns vegna rannsóknarinnar.

Nefndin hefur þegar skilað af sér skýrslu vegna Breiðavíkurheimilisins. Nú er nefndin með átta önnur vistheimili fyrir börn til skoðunar.

Þau eru: Vistheimilið Kumbaravogur, Heyrnleysingjaskólinn , Stúlknaheimilið Bjarg, Vistheimilið Reykjahlið, Heimavistarskólinn Jaðar, Upptökuheimili ríkisins, Unglingaheimili ríkisins og Vistheimilið Silungapollur.

Alls hefur nefndin rætt við 170 einstaklinga, bæði vistmenn og starfsmenn á fyrrnefndum heimilum.

Nefndin mun skila niðurstöðum úr rannsókn sinni á vistheimilunum að Kumbaravogi, Stúlknaheimilinu Bjargi og Heyrnarleysingjaskólanum þann fyrsta September.

Nefndin hefur rætt við 94 einstaklinga vegna þessara heimila og borist mikið magn skjallegra gagna samkvæmt tilkynningu.