Stjórnandi afgönsku leyniþjónustunnar drepinn

Talíbanar felldu í dag einn æðsta stjórnanda afgönsku leyniþjónustunnar. Skömmu áður tilkynntu Sameinuðu þjóðirnar um að tekist hefði að draga úr einni helstu tekjulind Talíbana, ópíumrækt.

Abdullah Laghmani, næstráðandi hjá afgönsku leyniþjónustunni, var í heimsókn í mosku í austurhluta Afganistans ásamt öðrum háttsettum í stjórnkerfi landsins. Bíl var sprengdur nærri þeim. Laghmani og minnst 21 til viðbótar féllu. Talíbanar lýstu ódæðinu þegar á hendur sér. Morðið á Laghmani er mikið áfall fyrir afgönsku leyniþjónustuna og yfirvöld en hann mun hafa sótt af hörku gegn Talíbönum og tengslaneti þeirra í afgönskum glæpasamtökum.

Helsta tekjulind Talíbana er ópíumsala og hefur það tengt þá og afganskar glæpaklíkur hagsmunaböndum.

Rétt áður en Laghami var ráðinn bani birtu Sameinuðu þjóðirnar skýrslu sem sýnir að snarlega hafi dregið úr valmúarækt og ópíumframleiðslu í landinu. Ræktin hafi dregist saman um tuttugu og 2% á einu ári og framleiðslan um tíu prósent.

Þar ráði nokkru aðgerðir vestrænna hersveita með aðstoð afganskrar lögreglu og leyniþjónustu en þó hefur einnig verið bent á að salar gangi á ópíumbirgðir og rækti minna af valmúa til að keyra upp verð á heróíni sem hefur lækkað nokkuð undanfarið.