Ferðamönnum bent á ódýra hamfarasvæðið Ísland

Eftir að sumra tók á norðurhveli jarðar hefur fjöldi erlendra fjölmiðla mært Ísland sem hagstæðan sumarleyfisstað. Ástæðan er auðvitað efnahagsþrengingar landsins, sem meðal annars hafa ollið hruni íslensku krónunnar.

Það hefur gert það að verkum að fyrir íbúa flestra landa er orðið mun hagstæðara að ferðast til landsins en nokkurtíman á umliðnum árum. Strax hjá töskubeltunum í Leifsstöð tekur skilti með áletruninni „Are you here for the nature or the exchange rate?" við ferðamönnum.

Meira að segja breska fyrirtækið Post Office metur Ísland sem hagstæðasta sumarleyfisstað heims um þessar mundir, en íslenska krónan er einn af afar fáum gjaldmiðlum sem hafa veikst gagnvart breska pundinu, ekki styrkst.



Hvalkjöt og skartgripir úr hrauni

Bandaríski vefmiðillinn The Hub greinir frá því að verðmiðinn á Íslandsferð sé nú loksins á færi almennings. Hér á landi sé hægt að gera hluti sem flestir hafa aldrei prófað áður, eins og að borða hval eða lunda, bruna á snjósleðum yfir jökul eða kaupa skartgripi úr alvöru hrauni.

Í grein The Hub segir einnig frá tískumógúlnum Nínu Björk, sem gerðist tískuleiðsögumaður um Reykjavík eftir bankahrunið og aðstoðar ferðamenn við alíslensk fatakaup - fyrir hóflega þóknun.

„Farið til hamfarasvæða"

Bandaríski ferðamálafrömuðurinn Pauline Frommer ráðleggur lesendum Marketplace að ferðast til hamfarasvæða ef þeir vilja hagstætt ferðalag - og nefnir Ísland að sjálfsögðu sem dæmi.

„Verðlagið á Íslandi er frábært. Farið þangað sem hörmungarnar eru," segir Pauline.

Reykjavík þykir smart



Bandaríska vefritið Huffington Post setur Ísland í 8. sæti yfir ákjósanlegustu og ódýrustu ferðamannastaði heims, en vefritið á sér milljónir lesenda. Þar er sérstaklega tiltekið hversu smart Reykjavík er og heilsulaugum landsins hrósað í hástert.

Efnahagsþrengingarnar sanna því hið fornkveðna; fátt er svo með öllu illt að ekki boði nokkuð gott - allavega fyrir erlenda ferðamenn.