Höfundur Íslenska efnahagsundursins útilokar ekki leiðréttingar

Jón F. Thoroddsen, höfundur bókarinnar Íslenska efnahagsundrið, útilokar ekki að hann muni leiðrétta það sem Björn Bjarnason fyrrverandi dómsmálaráðherra segir að sé missögn um sig í bókinni.

Á vefsíðu sinni sagði Björn að hann hafi lesið bókina og skrifað síðan um hana umsögn. „Jón dregur ályktanir, án þess að hafa nokkuð fyrir sér. Í umsögninni krefst ég, að hann leiðrétti missögn um mig. Án leiðréttingar og afsökunar, er næsta skref að leita til dómstóla," segir Björn á vefsíðu sinni.

Jón segir í samtali við fréttastofu að Björn hafi ekki haft samband við sig vegna málsins en hann hafi heyrt af skrifum hans á vefsíðunni. „En ég svara því bara á viðeigandi vettvangi, sem myndi þá vera í næstu bók," segir Jón.