Ragnheiður Clausen: Varð fyrir rafrænu einelti á Facebook

„Þetta er mjög dularfullt. Það sem ég hef velt fyrir mér fyrst og fremst er að einhver skuli nenna að gera mér þann grikk að ýta á þennan takka," segir Ragnheiður Clausen sem er forviða eftir að reikningi hennar á samskiptasíðunni Facebook var lokaður.

Það gerðist fyrir um mánuði síðan en sjálf hefur Ragnheiður ítrekað óskað eftir skýringum hversvegna honum var lokað. Svörin hafa þó ekki staðið á sér, en þau eru illskiljanleg.

„Mér voru gefnar aðvaranir um ég væri að brjóta reglur Facebook þó ekki hafi verið útskýrt hvað ég á að hafa gert," segir Ragnheiður en frændi hennar Ólafur Arnarson, hagfræðingur og rithöfundur, tók upp hanskann fyrir hana á bloggi sínu í dag. Þar kom fram að stuðningssíða handa Ragnheiði hefði verið stofnuð og þegar hafa yfir 400 manns skráð sig á hana.

Eftir að Ragnheiði var úthýst af Facebook ákvað hún að snúa á síðuna og skráði sig aftur inn, nú með nýtt póstfang. Svo virðist sem njósnarar síðunnar hafi verið með á nótunum því aftur var reikningi hennar lokað.

„Ég var bara að óska fólki til hamingju með afmælið og þá fæ ég tilkynningar um að reikningnum verði eytt út ef ég hætti þessu ekki," útskýrir Ragnheiður spurð hvað mögulega hafi geta orðið til þess að henni hafi verið úthýst. Hún segist þó gruna að einhverjir óprúttnir aðilar hafi ýtt á nokkurskonar tilkynningartakka á síðu hennar. Og það oftar en einu sinni.

Ragnheiður er búin að senda þrjá pósta til forsvarsmanna síðunnar. Alltaf fær hún stöðluð svör til baka sem virðast í engu samhengi við spurninguna. Oftast er henni bent á að fara yfir reglur Facebook. Þar segir að reikningum sé lokað særi fólk blygðunarsemi annarra, aðhafist eitthvað ólöglegt, dreifi klámi eða sé fyrirtæki og auglýsi sig þar með.

„Það eina sem ég gerði á síðunni var að tuða um ástandið, setja inn myndir af hundinum mínum og velta því fyrir mér hvort ég verði gift á morgun eða ekki," segir Rangheiður um daglegar venjur sínar á síðunni.

Ragnheiður bendir á að vandamálið sé þó ekki eingöngu hennar; svo virðist sem allir geti verið í hættu.

„Allir eru með þennan takka á síðunni sinni og hver sem er getur ýtt á hann," segir Ragnheiður.

Hún segir skaðann talsverðan enda gríðarlegt magn af myndum og upplýsingum horfnar. Þá eru allir vinir horfnir af síðunni, þar á meðal áhugamenn um hunda erlendis frá sem Ragnheiður var búinn að vingast við.

„Þetta er bara rafrænt einelti," segir Ragnheiður. Hún lætur þó ekki deigan síga. Nú er hún kominn með þriðja póstfangið og nýjan reikning. Þar hefur hún fengið að vera í friði, í bili að minnsta kosti.