Fimmtán drukknuðu þegar skemmtibátur sökk

Fimmtán ferðamenn drukknuðu þegar yfirhlaðinn skemmtibátur sökk á stöðuvatni í Makedóníu í gær. Fimmtíu og þrem var bjargað.

Báturinn var á útsýnissiglingu á Ohrid vatni þegar hann sökk mjög skyndilega um tvöhundruð metra frá landi. Óstaðfestar fréttir herma að hann hafi brotnað í tvennt.

Sextíu og átta manns voru um borð og er það mun meira en hann var byggður fyrir. Hann var smíðaður í Þýskalandi árið 1924. Ferðamennirnir voru allir frá Búlgaríu.

Aðra báta dreif að og tókst að bjarga fimmtíu og þremur, en fimmtán fundust drukknaðir.

Báturinn sökk á aðeins sex metra dýpi og er vel sjáanlegur þar sem hann liggur á botni vatnsins. Ohrid er annars dýpsta stöðuvatn á Balkanskaga.

Meðaldýpi er 155 metrar en dýpst er það 288 metrar. Það þekur 358 ferkílómetra.

Tuttugu og þriggja ára gamall skipstjóri bátsins hefur verið handtekinn og úrskurðaður í þrjátíu daga gæsluvarðhald.

Fánar hafa verið dregnir í hálfa stöng um alla Makedóníu og forseti Búlgaríu er kominn til landsins til þess að heimsækja þá landsmenn sína sem lifðu slysið af.