James Bond áhyggjufullur

Daniel Craig hefur enn og aftur lýst yfir áhyggjum sínum af lausafjárkreppunni sem nú hrjáir hinn vestræna heim. Eins og frægt er orðið hvatti Craig til sátta í deilunni milli Breta og Íslands í viðtali við Fréttablaðið en nú eru það áhyggjur af stjörnunum í Hollywood sem hvíla hvað þyngst á Daniel. „Bráðum verður skortur á fjármagni og þá eru allir í vanda.

Kvikmyndagerð byggist á lánsfé og ef það þurrkast upp stöðvast allar vélar,“ segir Daniel í samtali við fjölmiðla.

Craig er launahæsti leikarinn í Bretlandi eftir Quantum of Solace. Áhyggjur af fjármálum eru því ekki að sliga leikarann sjálfan. Þannig þótti honum það ekkert tiltökumál að reiða fram 600 milljónir til kaupa á íbúð við Regents Park í London.