Á topp Esjunnar þrátt fyrir mikil veikindi

„Viljinn og jákvætt hugarfar koma manni áfram. Það er allt hægt ef viljinn er fyrir hendi, erfiðleikar eru bara til að yfirstíga þá og styrkja mann. Ég er hæstánægð og það er bara eintóm gleði hér við rætur Esjunnar,“ sagði Björk Andersen sem gekk á Esjuna í dag ásamt átta öðrum fjallgöngumönnum.

Björk þjáist af beinkrabbameini og hafa læknar tjáð henni að einungis 3-5% lífslíkur séu hjá fólki sem á við sambærileg veikindi að stríða.

„Ég er búin að stefna að þessu alveg síðan ég veiktist. Markmiðið var að komast upp að Þverfellshorni og það tókst. Ég er að fara í lyfjameðferð eftir 2 daga og ákvað að nýta góða veðrið til göngunnar,“ sagði Björk ennfremur.

Hún segist vera gríðarlega stolt og ánægð með þennan árangur. „Sumt heilsuhraust fólk hefur sig ekki í þetta og kemst jafnvel ekki upp á topp. Þó maður eigi við veikindi að stríða þá á maður ekki að gefast upp. Góðir hlutir þurfa ekki að kosta peninga. Meðan maður hefur í sig og á og er sáttur við lífið og tilveruna þá er allt annað aukaatriði. Bestu hlutirnir í lífinu eru ókeypis,“ sagði Björk eldhress í viðtali við Vísi og var síður en svo þreytt eftir gönguna, „ég held ég snúi bara við og fari aftur upp, ég er ekkert þreytt.“

Björk var með öflugt og skemmtilegt fylgdarlið í för með sér en átta aðrir fjallgöngumenn gengu með henni upp á topp. Einn af þeim var Þorsteinn Jakobsson, göngugarpur, sem sló Íslandsmet í Esjugöngu með því að ganga sjö sinnum upp á Esjuna síðastliðinn laugardag.

„Ég er yfir mig sæl og glöð. Mig langaði að sýna gott fordæmi með jákvæðnina að leiðarljósi og vonandi skilar það sér. Það þýðir ekkert að leggjast í kör þótt það blási stundum á móti manni á lífsleiðinni. Mér finnst líka ekki vanþörf á að koma með eitthvað jákvætt og kærleiksríkt í þessar neikvæðu umræður sem hafa verið til staðar í landinu okkar undanfarna mánuði," sagði Björk Andersen í samtali við Vísi.