Lonely Planet velur tíu helgustu staði heims

Ferðabókaútgefandinn Lonely Planet hefur gefið út lista yfir tíu helgustu staði heimsins.

Lítil eða engin takmörk eru fyrir því sem skriffinnar Lonely Planet láta sér detta í hug en þeir hafa nú komið sér upp lista yfir það sem þeir telja vera tíu helgustu staði heimsins í trúarlegu tilliti. Reuters-fréttastofan birtir listann á síðu sinni en tekur jafnframt fram að hún taki enga ábyrgð á listanum eða því sannleiksgildi sem hann kunni að búa yfir.

Á toppi þessa merkilega lista trónir nígeríska háskólaborgin Ife en að sögn þarlendra trúarbókmennta lét guðinn Oludumare son sinn, Oduduwa, síga niður til jarðar í gullkeðju og gróðursetja þar pálmatré sem síðar blómstraði og skapaði þar með allan heiminn og hina sextán Yoruba-ættbálka sem nígeríska þjóðin er komin undan. Ife toppar þar með sjálfa Jerúsalem sem lendir í öðru sæti listans en þar á hornsteinn alls heimsins að liggja í musteri Sólómons sem múslimar telja það allra heilagasta. Somnath-hofið í Gujarat á Indlandi er næst en þar á hindúaguðinn Somraj að hafa skapað alheiminn og endurskapað hann svo margsinnis með aðstoð hins andlega meistara Krishna.

Í fjórða sæti listans er Kenýa-fjallið í Kenýa en það er fyrsti staðurinn á listanum sem er ekki haldið fram að heimurinn hafi orðið til á. Í kjölfarið fylgja svo staðir í Tíbet, Egyptalandi, Kína, Bólivíu, Grikklandi og meira að segja Washington í Bandaríkjunum en við Chelan-stöðuvatnið þar telja indíánar að hinn mikli himnahöfðingi hafi skapað allan heiminn og þar að auki skilið eftir leiðbeiningabækling handa mannfólkinu um hvernig það ætti að hegða sér í lífinu. Lesendur Lonely Planet geta því valið um fjölda staða þegar þeir ætla að gera það upp við sig hvar heimurinn varð til.