Ráðhústorgið aftur undir græna torfu

Ráðhústorgið á Akureyri mun taka stakkaskiptum þegar kemur að lit og mýkt á morgun fimmtudag en þá verður torgið tyrft og skreytt með fallegum blómum í öllum regnbogans litum. Í tilkynningu frá bænum segir að framkvæmdir hefjist í fyrramálið um áttaleytið og standa fram eftir degi. „Bæjarbúum er velkomið að taka þátt með því að leggja fram hjálparhönd. Verkstjórinn á svæðinu verður hjálpfúsum bæjarbúum innan handar með úthlutun verkefna."

Hátt í 400 fermetrar af þökum verða lagðar á torgið og verður undirlagið þannig úr garði gert að grasið mun halda sínum græna lit út sumarið með reglulegri vökvun. „Ef veðurguðirnir leyfa er stefnan tekin á að grilla pylsur á Ráðhústorgi í hádeginu á föstudaginn og er fólk hvatt til að mæta með sumarleg teppi og þiggja pylsur frá Kjarnafæði og pylsubrauð frá Kristjánsbakarí eða mæta með eigin hádegisverðarpakka," segir meðal annars í tilkynningunni.

Ráðhústorg var tyrft síðastliðið sumar og var afar mikil ánægja meðal bæjarbúa og gesta að geta notið lífsins á litla grasblettinum að því er segir ennfremur og því er bætt við að þær ánægjustundir verði án efa endurteknar í sumar á fallega grænu Ráðhústorgi.