Stefnan sett á að kljúfa hljóðmúrinn

Hátt í hundrað manns fylgdust með þegar öflugustu eldflaug sem smíðuð hefur verið af Íslendingum var skotið á loft frá Höskuldarvöllum, nálægt fjallinu Keili, um klukkan hálfþrjú í gær. Eldflaugin, sem vó átta kíló, náði þúsund kílómetra hraða og 2.700 metra hæð á 25 sekúndum. Fallhlíf var í flauginni svo hún gæti svifið til jarðar.

Útreikningar gerðu ráð fyrir að flaugin næði 3.000 metrum en vegna vinda flaug vélin örlítið á ská. Eldsneyti vélarinnar er gert úr saltpétri, sykri, þrúgusykri og ávaxtasykri og er algjörlega vistvænt.

Magnús Már Guðnason, einn aðstandenda áhugamannafélagsins AIR, sem stóð fyrir uppá­komunni, segir stefnuna setta á að kljúfa hljóðmúrinn en þá þarf að fara hraðar en 1.236 kílómetra á klukkustund. Það ætla þeir að gera með eldflaug sem hefur verið í smíðum í tvö ár og á að ná um 1.500 kílómetra hraða. Spáir Magnús að henni verði skotið upp í fyrsta lagi næsta sumar.

Áhugamannafélagið AIR hefur verið starfrækt frá 2006 en þá skutu þeir upp fyrstu eldflauginni sinni. Í maí árið 2008 var eldflaug skotið upp á vegum nemenda í HR og komst sú eldflaug á 750 kílómetra hraða. Magnús var þá aðstoðarkennari á nám­skeiðinu ásamt Smára Frey Smárasyni, hinum aðstandanda AIR.

Magnús segist hafa fengið áhuga á eldflaugum fyrir fimm árum eftir að hafa verið að fikta mikið í flugeldum og skoðað fræðin bak við þá. Kynntist hann tveimur strákum úr Hafnarfirði, Smára áðurnefndum og Steini Hlíðari Jónssyni og fóru þeir fljótlega að smíða eldflaugar.

„Það sem er skemmtilegast er að þetta samtvinnar efna-, eðlis- og verkfræði. Þetta er svona raunvísinda- og verkfræðipakki,“ segir Magnús. Nánari upplýsingar um félagið má nálgast á vefsíðunni www.eldflaug.com vidir@frettabladid.is