Taugarnar lykilatriði í kvöld

Í kvöld eigast MH og MR við í spurningakeppni framhaldsskólanna. Taugarnar verða þandar þegar menntskælingarnir úr höfuðborginni eigast við í beinni útsendingu úr sjónvarpssal Ríkissjónvarpsins í Efstaleiti.

Lið MH og MR hafa farið nokkuð ólíka leið í úrslitin. MR hefur unnið sínar viðureignir nokkuð auðveldlega, fór á kostum gegn Menntaskólanum á Egilsstöðum í áttaliða-úrslitum og vann Borgarholtsskóla nokkuð auðveldlega í undanúrslitunum. MH fór einnig nokkuð létt í gegnum áttaliða-úrslitin, sigraði þar Fjölbrautaskóla Suðurnesja en í undanúrslitunum var spennustigið við suðumarkið. MH hafði þar betur en Verslunarskólinn með því að svara síðustu spurningunni, þríþrautinni, rétt.

Páll Ásgeir Ásgeirsson var höfundur spurninga og dómari keppninnar í fyrra og Fréttablaðið fékk hann til að rýna aðeins í viðureign liðanna í kvöld.

„Sagan segir mér að MR muni vinna, þetta er ekkert byggt á faglegri skoðun, það er bara frávik ef einhver annar skóli en MR vinnur þessa keppni. Menn mega þó ekki gleyma því að það eru alltaf undantekningar frá öllum reglum,“ segir Páll. Orð að sönnu, MH hefur aldrei unnið þessa keppni. MR hefur hins vegar farið með sigur af hólmi oftar en nokkurt annað lið, alls þrettán sinnum. Ef Hljóðneminn fer niður í miðbæ verður það þriðja árið í röð.

Páll bætir því við að þegar komið sé á þennan stað í keppninni skipti hæfni liðanna minna máli en oft áður. „Þetta snýst alveg rosalega mikið um taugastyrk og andlegt jafnvægi, við höfum oft séð það í þessum þáttum, andlegi þátturinn er alveg gríðarlega mikil­vægur,“ segir Páll.

Spyrill í kvöld verður sem fyrr Eva María Jónsdóttir, dómari og spurningahöfundur er Davíð Þór Jónsson og stigavörður Ásgeir Erlendsson. Hinir tveir síðastnefndu hafa vakið mikla athygli fyrir smekklegan klæðnað í sjónvarpinu að undanförnu en mikil leynd hvílir yfir klæðaburði þeirra í kvöld.

„Hann verður við hæfi,“ var það eina sem Davíð Þór vildi láta hafa eftir sér í samtali við Fréttablaðið.

freyrgigja@frettabladid.is