Yfir 100 þúsund manns í bænum og allt fór vel fram

Að sögn lögreglunnar á höfuðborgarsvæðinu fór allt mjög vel fram í miðborginni í gær miðað við mannfjöldann sem þar var. Lögregla telur að um 100 til 110 þúsund manns hafi verið í miðborginni þegar mest var í kringum flugeldasýningu Menningarnætur í gær.

Að sögn vakthafandi aðalvarðstjóra eru engin stórmál á borði lögreglu eftir nóttina, þó nokkur erill hafi verið hjá lögreglu.

Átta minniháttar líkamsárásarmál komu til kasta lögreglu í nótt, en það mun hafa verið um drykkjulæti og slagsmál að ræða. Ekkert málanna hefur verið kært.

Þá hafði lögregla afskipti af einum unglingi undir áhrifum áfengis.

Að sögn aðstandenda menningarnætur gekk umferð úr miðborginni vel að lokinni dagskrá, og tók um 50 mínútur að losa Sæbrautina af umferð í austurátt.