Líka kreppa hjá al-Qaeda

Enginn sleppur undan kreppunni og nú eiga meira að segja al-Qaeda-hryðjuverkasamtökin í lausafjárvanda.

Breska ríkisútvarpið BBC hefur það eftir áreiðanlegum heimildamönnum að Osama bin Laden og félagar í al-Qaeda leiti nú allra leiða til að verða sér út um fjárhagsstuðning í kreppunni. Þetta gæti reynst þrautin þyngri þar sem hryðjuverkamenn eiga hvorki greiða leið að nýsköpunarsjóði né atvinnuleysisbótum og nú ku yfirdráttarheimild samtakanna vera alveg í botni.

Talíbanar eru hins vegar sagðir vera í mun betri málum þar sem heróínframleiðsla í Afganistan er víst með blómlegasta móti um þessar mundir en hún er helsta lífæð þeirra. Al-Qaeda eru hins vegar samtök og sem slík reiða þau sig á frjáls framlög í stað eiturlyfjagróða en eitthvað hefur harðnað á dalnum í frjálsum framlögum til hryðjuverkasamtaka síðan árið 2007 þegar hægt var að fjármagna nánast hvað sem var með hvaða hætti sem mönnum sýndist.

Þá berast einnig fréttir af því að shia-múslimasamtökin Hezbollah hafi líka þurft að hefja niðurskurðarhnífinn á loft og á þeim bænum grynnki menn á reikningahrúgunni með því að selja ólöglegar tónlistarupptökur, hugbúnað og smyglaðar sígarettur.