Stjórnarmyndunarviðræður halda áfram

Samninganefndir Vinstri grænna og Samfylkingarinnar komu saman að nýju klukkan hálftvö eftir hádegishlé. Jóhanna Sigurðardóttir, verðandi forsætisráðherra, kom korteri síðar en hún sagðist þá hafa fundað með Ingibjörgu Sólrúnu Gísladóttur í hádeginu auk fleiri aðilum sem hún vildi ekki nafngreina.

Ásgeir Jónsson, hagfræðingur hjá Greiningadeild Kaupþings, kom svo til fundar við samninganefndirnar skömmu fyrir tvö. Ingibjörg Sólrún Gísladóttir, formaður Samfylkingarinnar, er ekki á fundinum og óvíst er hversu mikinn þátt hún mun taka í fundarhöldum í dag.

Auk Jóhönnu Sigurðardóttur funda þeir Össur Skarphéðinsson og Lúðvík Bergvinsson fyrir hönd Samfylkingarinnar, en Steingrímur J. Sigfússon, Ögmundur Jónasson og Katrín Jakobsdóttir fyrir Vinstri græna.