Ekki hægt að bólusetja fólk gegn svínaflensu

Ekki er hægt að bólusetja sig til að koma í veg fyrir að fá svínaflensu. Þegar er þó byrjað að þróa bóluefni en það getur tekið vikur og jafnvel mánuði. Íslendingar hafa tryggt sér ákveðinn forgagn að því lyfi þegar það verður til.

Ef fólk veikist eru til veirulyf sem virka á flensuna eins líkt og lyfin Tamiflu og Relenxa. Hér á landi er til lyf fyrir þriðjung þjóðarinnar, sem er meira en flestar Evrópuþjóðir eru með.

Það er ekkert sem bendir til að hættulegt sé að borða svínakjöt eða svínaafurðir þar sem veiran hefur ekki greinst í svínum á hér á landi.

Ekki er mælt með því að almenningur gangi með grímur heldur aðeins heilbrigðisstarfsfólk sem umgengst fólk sem er veikt af flensunni. Ekki er sannað að grímurnar komi í veg fyrir smit.

Þúsundir manna deyja af flensu af hverju ári í Bandaríkjunum. Þar er aðallega um að ræða gamalt og veikt fólk. Það sem vekur ótta nú er að flestir þeirra sem hafa látist af flensunni í Mexíkó eru ungt heilsuhraust fólk eða frá þrítugsaldri og upp að fimmtugu.

Einkenni flensunnar eru hár hiti, hósti, höfuðverkur, vöðvaverkir og lungnabólga. Svínaflensan smitast á sama hátt og aðrar flensur með hósta, hnerra og snertingu.

Það sem fólk getur gert til að forðast flensuna er að gæta hreinlætis, þvo sér oft um hendurnar og forðast margmenni.