Varar við vindhviðum

Nú er mjög hvasst víðast hvar á landinu og víða eru vindhviður meira en 20 metrar á sekúntu, segir Sigurður Þ. Ragnarsson. Hann segir það vera varasamt að vera á ferðinni, sérstaklega með aftanívagna, aftan við fjöll. Sigurður segir að hviður á Kjalarnesi nái upp í 31 m/sekúndu, 35 m/ sekúndu á Snæfellsnesi og 22 m/ sekúndu á Hellisheiði.

Sigurður segir að ástæðan fyrir þessum snörpu vindhviðum sé kröpp lægð á norður- og norðvestanverðu landinu. Búast megi við hviðukenndu veðri á norður- og norðvestanverðu landinu fram eftir kvöldi. Vind sé hins vegar að lægja á austanverðu landinu. Sigurður vill benda fólki á þá meginreglu að vera ekki að ferðast með hjólhýsi þar sem vindur sé meiri en 15 m/ sekúndu. Slíkt geti verið hættulegt.

Vísir hefur heimildir fyrir því að bæði hjólhýsi og hestakerra hafi fokið út af veginum á Kjalarnesi í dag.