Í prufum fyrir þrjá söngleiki á Broadway

Stefán Karl Stefánsson leikari er um þessar mundir í prufum fyrir þrjá stóra söngleiki á Broadway. Eins og Fréttablaðið hefur greint frá hefur Stefán fengið lofsamlega dóma fyrir hlutverk sitt sem Trölli í söngleiknum Þegar Trölli stal jólunum. Sú sýning hefur verið sýnd víða um Bandaríkin undanfarna mánuði og vakið mikla athygli. Stefán Karl nýtur nú góðs af þessari athygli. „Ég get ekkert tjáð mig um þetta, ég er bara í prufum og þetta er allt óráðið," sagði Stefán í samtali við Fréttablaðið í gær.

Stærstur söngleikjanna þriggja er án nokkurs vafa sá sem fjallar um ævintýri Peters Parker sem er betur þekktur sem Köngulóarmaðurinn. Stefán kemur þar til greina sem The Green Goblin. Söngleikurinn er sá fyrsti sem gerður er eftir myndasögu Marvel-fyrirtækisins og öllu verður tjaldað til við uppsetningu hans. Lög og textar eru eftir þá fóstbræður Bono og The Edge, aðalmennina í írsku stórhljómsveitinni U2. Hann verður að öllum líkindum dýrasti söngleikurinn í sögu Broadway, er sagður kosta yfir 50 milljónir dollara eða sex milljarða íslenskra króna. Ráðgert er að æfingar hefjist síðar á þessu ári og að hann verði frumsýndur árið 2010.

Stefán hefur jafnframt verið prófaður í hlutverk hins valdasjúka ljóns Skara í söngleiknum Lion King. Teiknimyndin um ævintýri litla ljónsungans Simba fór sigurför um heiminn á sínum tíma og söngleikurinn hefur gengið fyrir fullu húsi á Broadway í nokkur ár. Þá hefur jafnframt komið til tals að Stefán taki að sér hlutverki í söngleiknum Billy Elliot sem einnig er byggður á samnefndri kvikmynd.

Stefán er þó með báðar fætur á jörðinni þrátt fyrir gylliboðin. Veit af fenginni reynslu að hlutirnir eru fljótir að breytast í bandarískum skemmtanaiðnaði. Hann viðurkennir þó að frammistaða hans sem Trölli hafi opnað honum stærri dyr en hann bjóst við. „Þetta er bara margra ára vinna sem er þarna að skila sér og þetta hefst allt með litlum hænuskrefum. Sýningin gekk mjög vel, við seldum 125 þúsund miða á tveimur og hálfum mánuði," útskýrir Stefán en það er svipaður fjöldi og kemur í Þjóðleikhúsið á hverju ári og jafngildir miðasölu upp á 800 hundruð milljónir íslenskra króna.

Stefán flutti nýverið ræðu á þrettándagleði Íslendingafélagsins í New York og talaði þar um nauðsyn þess að endurreisa orðspor Íslands út á við. Og listamenn væru ekkert undanskildir því verkefni. „Ísland þarf á smá andlitsupplyftingu og við sem erum að vinna úti í heimi verðum að átta okkur á mikilvægi þess að passa orðspor landsins."