Líf ríkisstjórnarinnar ræðst af Icesave

Ríkisstjórnin er sprungin og stjórnarkreppa blasir við verði Icesave-frumvarpið fellt á Alþingi. Þá er líklegt að þing verði rofið og boðað til kosninga. Málið veltur á nokkrum þingmönnum Vinstri grænna en líklegt er að flokkurinn klofni nái málið ekki fram að ganga.

Fyrsta umræða um frumvarp ríkisstjórnarinnar vegna Icesave hófst á Alþingi í dag en með því má segja að fjármálaráðherra og formaður Vinstri grænna leggi pólitíska framtíð sína að veði.

Forystumenn stjórnarflokkanna hafa sagt að þau treysti því að meirihluti verði fyrir málinu, en það er alls ekki öruggt. Reikna má með að öll stjórnarandstaðan greiði atkvæði gegn frumvarpinu, þótt það sé að sjálfsögðu ekki alveg gefið. En af því gefnu dugar að þrír þingmenn stjórnarflokkanna sitji hjá og einn greiði atkvæði á móti til að fella málið. En fjórir þingmenn Vinstri grænna hafa lýst efasemdum og jafnvel hreinni andstöðu við málið, þau Guðfríður Lilja Grétarsdóttir, Atli Gíslason, Lilja Mósesdóttir og Ögmundur Jónasson.

Áhrifamaður innan Vinstri grænna segir að ef þingmenn flokksins verði til þess að fella Icesave samkomulagið sé ríkisstjórnin sprungin og spurning hvort flokkurinn sé búinn að vera pólitískt.

Núverandi ríkisstjórn er með 34 þingmenn af 63. Ef stjórnin springur er ólíklegt að hægt verði að mynda annan starfhæfan meirihluta þar sem Samfylkingin færi varla í samstarf með Sjálfstæðisflokki, sem saman eru með 36 þingmenn og Vinstri Grænir ekki heldur, en þingmannatala þeirra og Sjálfstæðismanna dygði heldur ekki til og því þyrfti til viðbótar annað hvort Borgarahreyfingu eða Framsóknarflokk, sem Vinstri grænir hefðu væntanlega lítinn áhuga á að vinna með eftir að Icesavefrumvarpið hefði verið fellt. Líklegast myndi forseti Íslands því fallast á tillögu forsætisráðherra um þingrof. Ef sú yrði staðan er ekki gefið að núverandi stjórn sæti fram að kosningum.

Það gæti allt eins farið svo eftir viðræður flokksformanna við forseta Íslands að minnihlutastjórn Vinstri grænna einna eða minnihlutastjórn einhvers annars flokks eða flokka sæti fram að kosningum, sem yrðu að fara fram innan 45 daga frá boðun þingrofs. Forseti gæti hins vegar einnig ákveðið að skipa utanþingsstjórn, annað hvort tímabundið eða út kjörtímabilið. Fari málið hins vegar þannig að boðað verði til kosninga eftir að málið yrði fellt á Alþingi, gætu kosningar farið fram í byrjun september.