Ólafur Stefánsson stofnar barnaskóla

„Draumurinn er að byrja í haust," segir Edda Huld Sigurðardóttir sem ásamt Ólafi Stefánssyni handboltamanni, Þorvaldi Þorsteinssyni listamanni og Jennýju Guðrúnu Jónsdóttur kennara ætlar að stofna nýjan grunnskóla í Heilsuverndarstöðinni við Barónsstíg.

Edda Huld, sem áður var skólastjóri Ísaksskóla, segir að í nýja skólanum verði áhersla á skapandi skólastarf sem verði verulega frábrugðið hefðbundnu skólastarfi.

„Við ætlum að fara aðrar leiðir en viljum ekki ræða þær á meðan málið er ekki lengra komið. Við eigum tíma hjá borgarstjóra á miðvikudag í næstu viku," svarar Edda Huld og vísar til þess að enn hafi ekki verið sótt um tilskilin leyfi fyrir starfrækslu skólans þótt undirbúningur þess sé á lokastigi.

Að sögn Eddu Huldar verður nýi skólinn fyrir allan grunnskólaaldur. Fyrst sé þó ætlunin að taka við um sextíu nemendum á aldrinum fimm til tíu ára. Húsnæðið, sem fengið hafi verið á jarðhæð gömlu Heilsuverndarstöðvarinnar, sé nýlega endurnýjað og uppfylli nauðsynlegar kröfur.

„Hugmyndir okkar Jennýjar, sem komum úr skólaumhverfinu, fóru mjög vel saman við pælingar Þorvaldar og svo kom Ólafur inn í þetta nýlega," útskýrir Edda Huld samvinnuna við Þorvald og Ólaf. „Við finnum það í hjartanu að þetta er rétt sem við erum að fara af stað með. Við erum mjög ólík en samt sem áður með mjög svipaða hugsun: að mæta barninu þar sem það er statt, opna bara og sjá hvað er þar inni og hvað þarf að fá að njóta sín."

Þorvaldur og Ólafur munu koma að skólastarfinu sjálfu. „Þorvaldur verður hjá okkur dags daglega. Ólafur ætlar að spila handbolta í Þýskalandi en mun verða hjá okkur eftir því sem hann hefur tök á." segir Edda Huld Sigurðardóttir.