Menntamálaráðherra býst ekki við að háskólar verði sameinaðir í tvo

Katrín Jakobsdóttir menntamálaráðherra á ekki von á því að farin verði sú leið að sameina háskóla þannig að tveir háskólar verði starfandi á landinu líkt og mælt er með í erlendri skýrslu sem gerð var opinber í maí. Þetta kom fram í máli Katrínar á Alþingi í dag þegar Birkir J. Jónsson, þingmaður Framsóknarflokksins, spurði ráðherra hvort hún hygðist standa vörð um að Háskólinn á Akureyri verði áfram sjálfstæð stofnun.

Í skýrslu erlendra sérfræðinga sem gerð var opinber í maí er mælt með því að tveggja skóla kerfi verði við lýði hér á landi. Einn háskóli verði byggður á Háskólanum í Reykjavík, með Listaháskóla Íslands og Háskólanum á Bifröst. Annar háskóli verði svo byggður á Háskóla Íslands með öllum ríkisháskólunum.

Katrín segist eiga von á því að fremur verði byggt á samstarfi skólanna fremur en sameiningu. Hún gerði sér vonir um að eining næðist um þá leið sem yrði farin.