Skattleggjum okkur ekki útúr kreppunni

Hanna Birna Kristjánsdóttir, borgarstjóri, segir að íslenskt samfélag muni ekki skattleggja sig út úr kreppunni. Síðari umræða um frumvarp að fjárhagsáætlun Reykjavíkurborgar fyrir árið 2010 fer fram í borgarstjórn í dag.

„Við verðum að fara sömu leið og heimili og fyrirtæki landsins, forgangsraða í þágu þess sem mestu skiptir, hagræða og spara. Við verðum að ýta undir dugnaðinn og metnaðinn sem einkennir þjóðarsálina. Hvetja til atvinnusköpunar og standa þannig vörð um tekjugrundvöll fjölskyldna og fyrirtækja og tryggja að íbúar þessarar borgar njóti góðrar grunnþjónustu," sagði Hanna Birna í ræðu sinni í borgarstjórn að fram kemur í tilkynningu Reykjavíkurborgar.

Hanna Birna kynnti breytingatillögur meirihlutans við fjárhagsáætlun borgarinnar. Í tilkynningunni segir að borgin forgangsraði í þágu barna og velferðar án þess að hækka skatta eða gjöld á grunnþjónustu.

Áætlað er að liðurinn fjárhagsaðstoð muni hækka úr 1,6 milljarði króna samkvæmt útkomuspá 2009 í rúma 2 milljarða. Lagt er til að 142 milljónir króna verði varið til að hækka hámarksfjárhæð fjárhagsaðstoðar í samræmi við verðlagsbreytingar síðustu 12 mánaða.

Í máli borgarstjóra kom fram að ákvörðun var tekin um að fjárhagsaðstoð og húsaleigubætur séu bundnir liðir þannig að reynist áætluð útgjöld of lág þá mun borgarsjóður engu að síður greiða það sem upp á vantar. „Þannig á enginn velkjast í vafa um að við munum standa við bakið á almenningi í borginni sem á rétt á þessum stuðningi," sagði Hanna Birna.