Frumvarp um Icesave lagt fyrir Alþingi eftir helgi

Steingrímur J. Sigfússon, fjármálaráðherra, reiknar með því að frumvarp um ríkisábyrgð vegna Icesave samkomulagsins verði lagt fyrir Alþingi eftir helgi. Hann segir erfitt að bera samkomulagið undir þjóðaratkvæði.

Steingrímur hafði vonast eftir að hann myndi ná að leggja frumvarpið fyrir Alþingi í gær en greinargerð og fylgiskjöl hafi ekki verið tilbúin. Hann reiknar með því að málið verði tekið fyrir ríkisstjórn eftir helgi og í framhaldinu á Alþingi.

Tjáir sig ekki um orð Ögmundar og Guðfríðar

Aðspurður hvort að taugatitrings gæti meðal þingmanna VG um málið segir ráðherrann: „Eðlilega eru menn ekki hrifnir að þessu máli. Þetta er ekki skemmtilegt mál en það þarf að leiða það til lykta."

Steingrímur tjáir sig ekki um yfirlýsingar Ögmundar Jónassonar, heilbrigðisráðherra, og Guðfríðar Lilja Grétarsdóttir, þingflokksformanns VG, um Icesave samkomulagið.

„Ég held að það sé best að allir fá öll gögn og skoði málið. Ég treysti á að menn sjái að þetta er besta leiðin sem við eigum út úr þessu," segir Steingrímur.



Of flókið til að leggja málið í þjóðaratkvæði

Þrettán þingmenn Framsóknarflokks og Borgarahreyfingar vilja að efnt verði til þjóðaratkvæðagreiðslu eins fljótt og auðið er um hvort staðfesta eigi ríkisábyrgð vegna Icesave-reikninganna.

Steingrímur telur að þetta tiltekna mál sé of snúið til að hægt sé að bera það undir þjóðaratkvæði. Auk þess séu ekki til nein lög um þjóðaratkvæðagreiðslur.

Steingrímur segir stjórnvöld bara á samnningum við önnur ríki og því sé erfitt að bera þetta tiltekna mál undir þjóðaratkvæði. „Alþingi fól framkvæmdavaldinu að klára málið. Ég held að það verði að vera ábyrgð framkvæmdavaldsins að leiða málið til lykta," segir ráðherrann.

„Þeir sem skópu þennan vanda eru þeir seku í þessu máli en ekki þeir sem eru að reyna að greina úr því," segir Steingrímur og bætir við að það fylgi gríðarleg ábyrgð að hafna ríkisábyrgðinni.