Lagaprófessor: Fyrirvarar öðlast gildi þegar Bretar samþykkja

„Ég skil þá að því leyti að ég myndi vilja hnykkja á þessu," segir Stefán Már Stefánsson, lagaprófessor við Háskóla Íslands, um álit InDefence hópsins varðandi Icesave fyrirvarana. InDefence lýsti í morgun áhyggjum af því að fyrirvararnir hefðu hugsanlega ekki gildi fyrir breskum dómstólum.

Stefán tekur ekki undir þessar áhyggjur, en segir gildi fyrirvaranna byggja á samþykki breskra stjórnvalda.

„Þetta náttúrulega byggist á því að Bretarnir samþykki fyrirvarana. Það er auðvitað ekki komið í land ennþá. Þar fyrir utan getur vel verið að Bretar biðji um breytingar á fyrirvörunum."

„Ef bresk stjórnvöld samþykkja fyrirvarana eins og þeir liggja fyrir, þá er kominn nýr samningur og gamli samningurinn gildir ekki nema með hliðsjón af fyrirvörunum," segir Stefán, sem telur að fyrirvarnir öðlist fullt gildi, samþykki bresk yfirvöld þá - á því leiki enginn vafi.