InDefence: Óvíst hvort fyrirvarar hafi gildi

InDefence hopurinn hefur eftir sérfræðingi í alþjóðarétti við Cambridge háskóla að hann telji óvíst að fyrirvararnir hafi nokkurt gildi samkvæmt breskum lgöum. Því telur InDefance hópurinn að afgreiðsla málsins með fyrirvörum, feli í sér mikla áhættu fyrir Íslendinga.

„Þar sem bresk lög gilda um Icesave samningana er afar mikilvægt að fyrirvarar sem Alþingi setur við ríkisábyrgðina hafi ótvírætt gildi gagnvart þeim. Um það ríkir óvissa," segir í yfirlýsingu frá InDefence.

Hópurinn segist hafa borið fyrirvarana undir Dr. Michael Waibel, sérfræðing í alþjóðarétti við Cambridge háskóla og er bráðabirgðaálit hans að að óvíst sé hvort fyrirliggjandi fyrirvarar hafi gildi samkvæmt breskum lögum.

„Slík afgreiðsla málsins beri því í sér mikla áhættu fyrir Íslendinga. Sé það raunin að fyrirvarar Alþingis hafi ekki gildi samkvæmt breskum lögum eru Alþingismenn í raun að samþykkja Icesave samningana óbreytta, samninga sem meirihluti þjóðarinnar og þingmanna telur óviðunandi," benda forsvarsmenn hópsins á.

„Í ljósi þessarar óvissu er nauðsynlegt að Alþingi afli formlegs álits óháðra sérfræðinga í breskum lögum til að fá úr því skorið hvort fyrirvararnir við ríkisábyrgð hafi gildi fyrir breskum dómstólum. Slíkt sérfræðiálit þarf að berast Alþingi áður en frumvarp um ríkisábyrgð á Icesave samningnum er afgreitt.

Að hundsa þessa grundvallarspurningu gætu reynst afdrifarík afglöp, því um er að ræða óvissu sem getur kostað Íslensku þjóðina hundruð milljarða. InDefence hópurinn skorar á Alþingismenn þjóðarinnar að eyða óvissu um lagalegt gildi fyrirvaranna með því að kalla tafarlaust eftir formlegu áliti óháðra sérfræðinga í breskum lögum," segir að lokum.