Baugur vildi bíða betri tíðar

Baugur, sem var hafnað um áframhaldandi greiðslustöðvun í hádeginu, skuldar 148 milljarða umfram eignir samkvæmt úrskurði Héraðsdóms Reykjavíkur. Þá segir í dómsorði að þeir hafi viljað áframhaldandi greiðslustöðvun til þess að bíða betri tíðar. Þar kemur einnig fram að ekki hafi verið raunhæfur möguleiki hjá Baugi að koma nýrri skipan á fjármál sín.

Í niðurstöðu úrskurðarins segir að Baugur hafi talið nauðsynlegt að bíða um sinn og verja eignir sínar í von um að úr muni rætast á fjármálamörkuðum. Einnig væri nauðsynlegt að hefja nauðasamningsumleitanir.

Þá segir jafnframt að hvorugt þessara atriða séu til þess fallin að koma nýrri skipan á fjármál sóknaraðila; fyrra atriðið feli í raun í sér að „bíða eftir betri tíð", eins og það var orðað í úrskurði. Því var beiðni þeirra um áframhaldandi greiðslustöðvun hafnað.

Þetta þýðir að gjaldþrot blasir nú við Baugi Group. Glitnir og Íslandsbanki, sem eru í kröfuhafahópi Baugs lögðust gegn því að félaginu yrði veitt áframhaldandi greiðslustöðvun.

Stjórnendur Baugs ætla ekki að tjá sig um ákvörðun dómarans á þessu stigi málsins. Úrskurðinum er ekki unnt að áfrýja.