Hæ, ég er með kynsjúkdóm

Brasilíska heilbrigðisráðuneytið hefur útbúið heimasíðu sem gerir fólki kleift að láta elskhuga sína vita af kynsjúkdómasmiti með tölvupóstkorti.

Yfirmaður kynsjúkdóma- og eyðniáætlunar landsins bendir á að margir eigi erfitt með að segja elskhugum sínum að þeir séu smitaðir af kynsjúkdómi.

Í yfirlýsingu sem ráðuneytið sendi frá sér í vikunni segir að tölvupóstkortin gætu hjálpað fólki að takast á við vandann á beinskeyttan hátt.

Eitt kortanna er til dæmis af ungum manni á nærbuxunum einum klæða sem hallar sér aftur.

Þar stendur svo: „Hæhæ! Ég veit ekki hvort þetta er heppilegasta leiðin til að láta þig vita, en ég er víst með kynsjúkdóm."

Á kortinu er viðtakandinn hvattur til að leita einnig til læknis.