Vínarljóð og forleikir

Vínartónleikar Sinfóníuhljómsveitar Íslands halda áfram að vera eitt vinsælasta fyrirbrigðið á efnisskrá hljómsveitarinnar. Ekki þarf færri en fjóra tónleika til að svara eftirspurn og verða þeir þann 7., 8., 9., og 10. janúar.

Þá mun hljómsveitin bregða sér í huganum suður til Vínarborgar og leika sígrænar perlur eftir Strauss, Lehár og fleiri ódauðlega meistara óperettusmíða, m.a. úr Leðurblökunni og Kátu ekkjunni. Stjórnandi er Markus Poschner sem er einn aðalstjórnenda við Komische Oper í Berlin. Einsöngvari er Dísella Lárusdóttir sem hefur vakið verðskuldaða athygli á síðustu árum.

Dísella mun syngja nokkur vinsælustu lög þessa tímabundna forms söngleikjanna: Dein ist mein ganzes Herz úr Brosandi landi eftir Lehar, og hið fræga Vilja-Lied eftir hann úr Kátu ekkjunni meðal annars. Eftir Johann Strauss hljómar Accelerationen-valsinn, forleikir að Leðurblökunni og Sígaunabaróninum en að loknum stykkjum og sönglögum eftir þá Straussara bregður hljómsveitin sér til í tíma og flytur forleik Bernstein að Candide og Disella syngur Glitter and be gay úr sama verki.

Dísella Lárusdóttir á ekki að langt að sækja tónlistargáfurnar: bæði faðir hennar og Þorvaldur afi hennar sátu lengst starfsævi sinnar á bekkjum Sinfóníunnar og móðir hennar Sigríður Þorvaldsdóttir var dáð söngleikjaleikkona á sínum bestu árum í Þjóðleikhúsinu. Dísella hefur vakið mikla athygli fyrir söng sinn og glæsilega framkomu. Hún komst í úrslit Metropolitan-söngkeppninnar 2007 og var í kjölfarið boðið að syngja þar í óperu eftir Philip Glass. Hún hefur fengið mikið lof vestanhafs, þar sem hún býr, fyrir söng sinn og verður gaman að sjá hana takast á við hinar sígildu perlur óperettunnar. Til stóð að hún tæki þátt í sviðsetningu óperunnar íslensku á verkefni vorsins en því hefur verið frestað svo enn verða íslenskir óperuaðdáendur að bíða eftir að sjá hana í leik- og sönghlutverki á sviði.