Sjötíu prófessorar handteknir

Sjötíu háskólaprófessorar hafa verið handteknir í Teheran, höfuðborg Írans, fyrir að hafa hitt og stutt við bakið á stjórnar­andstöðu­leiðtoganum Mir-Hossein Mousavi. Þetta kom fram á heimasíðu Mousavis í gær. Á sama tíma lofaði hann að halda áfram baráttu sinni, þrátt fyrir tilraunir til að einangra hann.

Lögregla braut á bak aftur mótmæli fyrir utan þinghúsið í Teheran á miðvikudag. Að sögn sjónarvotta voru mótmælendur lamdir með kylfum og einhverjir skotnir. Ríkis­fjölmiðlar hafa ekki greint frá neinum dauðsföllum meðal mótmælenda en segja hins vegar átta meðlimi Basij-sérsveitarinnar hafa látið lífið. Fréttirnar eru óstaðfestar sökum þess að erlendum fjölmiðlum hefur verið bannað að stunda vinnu á götum úti.

Mahmoud Ahmadinejad, forseti Írans, gagnrýndi Barack Obama Bandaríkjaforseta harðlega í gær og líkti honum við forvera hans, George W. Bush. Obama hefur sagst vera hneykslaður á því hvernig mótmælin hafa verið brotin á bak aftur, en fyrir forsetakosningarnar hafði hann opnað á möguleikann á auknum samskiptum við Íran. Ahmadinejad sagði í gær að ef Obama héldi áfram á sömu braut yrði „ekkert til að ræða"