Nýtir skinn sem hefði annars verið fargað

Skinn af lömbum sem drepast við burð eða drepast áður en þau eru rekin á fjall eru nú nýtt í nýrri fatalínu Eggerts Jóhannssonar feldskera.

„Íslendingar átta sig ekki alltaf á því hvað þeir eru með mikil verðmæti í kringum sig,“ segir Eggert, en fatnaðurinn sem hann kynnti í gær er afrakstur fyrsta ársins í þriggja ára tilraunaverkefni.

Nýja fatalínan nefnist Born Again, en verkefnið er unnið í samstarfi Eggerts, Helgu Björnsson, fatahönnuðar í París, Landssamtaka sauðfjárbænda og Loðskinnu á Sauðárkróki. „Fyrsta skrefið hefur verið stigið í nýtingu á hráefni sem annars hefði verið hent,“ sagði Eggert feldskeri á kynningunni í gær.

Skinnum af lömbum sem drepist hafa áður en hægt hefur verið að reka þau á fjall hefur jafnan verið fargað með skrokkunum. Sindri Sigurgeirsson segir að nú kunni þó að vera eftir einhverju að slægjast fyrir bændur að leggja sig eftir því að halda upp á þau. Bændur fá greiddar 1.250 krónur fyrir skinnið, en þurfa sjálfir að sjá um fláningu og að koma því í sútun. „Það verður því bara að koma í ljós hvort bændur geta gefið sér tíma í þetta á vorin þegar hvað mest er að gera,“ segir Sindri, en telur líklegt að fari bændur út í þetta þá reyni þeir að safna saman skinnunum og geyma í frysti svo að þau úldni ekki.

„Þetta geta hins vegar orðið dálitlar upphæðir á stóru búi,“ segir hann, en þar sem fæðast milli 13 og 14 hundruð lömb að vori megi geta sér til að um 50 drepist við burð eða á fyrstu dögunum eftir burð.

Jón Bjarnason landbúnaðarráðherra, sem var viðstaddur kynninguna á Born Again-fatalínunni í gær, fagnaði því sérstaklega í ræðu sinni að hitta þar fyrir gamlan nemanda að norðan í forsvari fyrir vinnsluna á skinninu, Gunnstein Björnsson, framkvæmdastjóra Loðskinnu. „Það eykur enn á ágæti þessa starfs að skinnin eru sútuð og unnin hjá Loðskinni á Sauðárkróki,“ sagði hann, en kvaðst annars sem gamall sauðfjárbóndi vanur að hugsa til þess hvernig gjörnýta mætti landsins afurðir. „Ég er viss um að íslenskir bændur taka þessu vel.“

olikr@frettabladid.is