Stjórnendurnir fóru í 60 ferðir til útlanda

Stjórnendur Sameinaða lífeyrissjóðsins fóru 60 sinnum til útlanda, þar af rúmlega 30 boðsferðir, og í sex laxveiðiferðir á vegum sjóðsins á tímabilinu 2003 til 2008. Þetta kemur fram í svari sjóðsins við fyrirspurn frá Félagi vélstjóra og málmtæknimanna.

Stjórn Félags vélstjóra og málmtæknimanna óskaði 27. janúar eftir upplýsingum um boðsferðir, gjafir og annað sem framkvæmdastjóri, forstöðumaður eignastýringar og stjórnarmenn sjóðsins hefðu þegið af félögum sem sjóðurinn hefur fjárfest í frá og með árinu 2003 til ársloka 2008.

Samskipti vegna erlendra eigna kölluðu á utanlandsferðir

,,Mikil samskipti hafa verið við íslensku bankana vegna innlendra og erlendra eigna sjóðsins, en þeir hafa annast ráðgjöf, eignastýringu og ýmis viðskipti í tengslum við þær. Sjóðurinn hefur einnig átt í beinum samskiptum við erlenda eignarstýringaraðila, sem hafa veitt margvíslega þjónustu er varða úttektir og upplýsingagjöf," segir í svari Sameinaða lífeyrissjóðsins.

Þar segir að samskiptin hafi fyrst og fremst verið í höndum Kristjáns Arnar Sigurðssonar, framkvæmdastjóra sjóðsins, og Sigríðar Hrundar Guðmundsdóttur, forstöðumanns eignastýringasviðs. Samskiptin hafi kallað á allnokkrar utanlandsferðir sem bæði hafa verið skipulagðar af sjóðnum sjálfum en einnig af fyrirtækjum sem sjóðurinn var í viðskiptum við.

Að jafnaði skipulagðar kynnisferðir

Umræddir starfsmenn fóru í fimm ferðir á ári vegna eigna sjóðsins erlendis en að auki fór Ólafur Haukur Jónsson, forstöðumaður rekstrarsviðs, í tvær slíkar ferðir síðastliðin tvö ár. ,,Að jafnaði hefur um helmingur þessara ferða verið skipulagðar kynnisferðir fyrir fulltrúa íslenskra fjárfesta vegna tiltekinna fjárfestingaverkefna erlendis og hafa þær verið greiddar af samstarfsaðilum Sameinaða lífeyrissjóðsins."

Í svarinu kemur fram að aðrar utanlandsferðir hafi verið að frumkvæði sjóðsins og greiddar af honum. ,,Innanlands hafa framkvæmdastjóri og forstöðumaður eignastýringarsviðs hvort um sig þegið eina stutta boðsferð árlega í veiði undanfarin þrjú ár. Stjórnarmenn Sameinaða lífeyrissjóðsins hafa hins vegar ekki þegið boðsferðir á vegum sjóðsins, hvorki innanlands né utan."

Fyrirspurn stjórnar Félags vélstjóra og málmtæknimanna er hægt að nálgast hér og svar Sameinaða lífeyrissjóðsins hér.