Hrærður eins og skyr yfir ákvörðun Símans

„Ég segi bara eins og formaður Sjálfstæðisflokksins, ég er hrærður eins og skyr. Þetta er virkilega flott og bendir til þess að hjartað hjá þeim slái í takt við alla aðra," segir Sveinn Guðmundsson, formaður Hjartaheilla á höfuðborgarsvæðinu, um þá ákvörðun Símans að gefa samtökunum allan ágóða sinn af símasöfninni á laugardaginn.

Síminn tók 79 krónur fyrir hvert símtal í 900 númer og samkvæmt því sem Vísir kemst næst nemur upphæðin rúmri milljón. Á laugardagskvöldið söfnuðu Íslendingar 46,6 milljónum króna í landssöfnun til kaupa á nýju hjartaþræðingartæki til Landspítalans- Háskólasjukrahúss.

Sveinn segir að 700 manns falli árlega úr hjarta- og æðarsjúkdómum. Hann vonar að stuðningur landsmanna við Hjartheill og um leið hjartadeild LSH auðveldi vinnu starfsfólk og geri rannsóknir þeirra betri.