Vinnuskólinn fékk umhverfismerkið Grænfánann

Vinnuskóli Reykjavíkur hlaut í dag umhverfismerkið Grænfánann sem er alþjóðlegt verkefni sem ætlað er að auka umhverfismennt og styrkja umhverfisstefnu í skólum. Grænfáninn var dreginn að húni á Miklatúni fyrr í dag og af því tilefni sagði Svandís Svavarsdóttir, umhverfisráðherra, að ekki þurfi að kvíða framtíðinni fyrst hinir ungu starfsmenn vinnuskólans ætli að starfa í anda sjálfbærrar þróunar og gæta þess að öll skref verði græn.

Fram kemur á vef Reykjavíkurborgar að Vinnuskólinn hefur bryddað upp á nokkrum nýjungum í sumar vegna Grænfánans, til dæmis hafa vinnuhópar skólans flokkað allan úrgang sem kemur frá þeim. Þá voru ráðnir átta fræðsluleiðbeinendur sem sjá um fræðslu til allra hópa skólans.