Audi kominn í leitirnar - þjófarnir fá fundarlaunin

Audi bifreiðin sem lýst var eftir hér á Vísi í gærdag, er komin í leitirnar. Eigandi bifreiðarinnar hét fundarlaunum fyrir þann sem veitt gæti upplýsingar um bifreiðina. Eigandinn fór krókaleiðir til að finna bílinn.

Bifreiðin er af gerðinni Audi A4 en henni var stolið af bílasölu í Hafnarfirði aðfararnótt sunnudagsins. Bíllinn er ekki kaskótryggður og því tjónið tilfinnanlegt fyrir eigandann sem hét 200 þúsund krónum, hverjum þeim sem gæfi ábendingar sem kæmu að gagni við að upplýsa málið.

Eigandinn leitaði til aðila sem náðu sambandi við þjófana, í gegnum nokkra milliliði. Eigandinn þarf því þegar upp er staðið að greiða þjófunum fundarlaun, þrátt fyrir að vita aldrei hver stal bílnum í raun. Honum gremst það mikið, en segist ekki hafa annarra kosta völ.

Hann segist hafa heimildir fyrir því að aðili hafi óskað eftir því að fá ýmsa varahluti úr bíl af þessari gerð, svo sem mótor og sjálfskiptingu. Því hafi menn verið gerðir út af örkinni til að stela bílnum.

Þjófarnir sættust á að fara með bílinn á tiltekinn stað, en þar sá vegfarandi til bílsins og lét lögreglu vita. Hefði eigandinn hinsvegar ekki verið búinn að semja við þjófana um afhendingarstað, hefði bíllinn aldrei verið á þeim stað sem hann sást. Hann segist engu að síður þakklátur lögreglu - hún hafi gert allt sem hún mögulega gat miðað við sinn mannskap.

Bíllinn er óskemmdur að sögn eigandans.